Repotting

New Moon 03/09/24 | 記錄「攣毛妹」之移植

是日New Moon，適合種植、repotting。「的」起心肝將已經逼爆盆嘅「攣毛妹」移植到早已枯死「Ben-Hur」大盆去。

「Ben-Hur」，為去年進駐此工作室時（二嬸送）之入伙大樹，入嚟無耐已開始瘋狂落葉，可能我同佢當時都未ready。搶救多時仍返魂無術，最後只剩禿禿嘅枝啊節。一直對佢感愧疚，因此留下只剩樹幹同泥嘅盆在此，至此超過一年。

「攣毛妹」，卷葉榕，都係二嬸買，五月Spring Live set裝飾。降臨於春季，無意間代表咗某種Rebirth。

完show帶佢返studio，佢就一路高一路高，短短三個月已經高咗一倍。

最近發現佢停止發育，並且只懂向上呈高瘦長狀，貌似已outgrow個細盆，係時候搬家。既然如此，就趁今日新月，一個藍手兩個新舊盆栽，嚟做個小ritual。

移走Ben-Hur前，先向它深深答謝。先嘗試徒手將泥土翻開，發現從盆頂到中間，整個根部都係硬如石頭的泥地，整佢個制，難怪無法存活。挖不開，工作室沒有工具，唯有用匙羹慢慢翻、慢慢挖。要靠驗我耐性啊，好吧。

用一個小時完成告別式，挖到塵土飛揚、滿頭大汗。混入新泥，準備植入攣毛妹，併合無法完全清走嘅舊泥土、斷掉的根部，搖身成為精神爽利嘅攣毛hur2.0。

完成後，有種筋骨舒暢、煥然一新嘅感覺，由心。

周遭越荒誕，越顯簡樸自然之珍貴。Get your hands dirty, do the manual and menial work, 沒有比這更真實的事情。

就是療癒，就是洗禮，舒筋活絡能醫百病。

攣毛妹妳要健康成長，等待見證翻開又一新章。