全力練歌準備中,正常Newsletter要skip多一個禮拜,無人會怪我啦係咪😏。
準備間,有啲感想,share吓:
感想1/ 實現自我任性rundown
今次歌單,主題說不上有定無,主題或者就是我本人。
我最近喜歡的歌,想試試演繹的歌,諗到就放入去。既然喜歡,就等於反映及呼應我現在所想和所感。這樣很好。
無特登揀選「演唱會必備名曲」,但亦無故意避開,反正直覺邊隻啱,就唱。排出嚟好似有少少實驗性,但其實又唔洗諗到咁誇張,最實驗性,就只不過係試試搵一次,完全唱歌俾自己聽。
就好似少年的我匿埋喺自己房,一個人聽歌咁。
好純粹,諗落好似從未試過咁純粹。
感想2// Mikey
說說Mike Orange.
今次憑直覺搵佢再合作,相約開會講咗幾句,已知搵啱人。
話說呢種兩個人兩支結他嘅intimate set,我想做好耐。但每次都會因為自己拗底、覺得「唔夠撐」,到中途總會越加越多人,始終未成事過。
開始討論時有一下(又)失守,問咗Mikey一句「啊…..um……你覺得洗唔洗加支bass咁呢?😬」好在佢夠堅定,果斷ダメ(DA-ME)。見佢信心滿滿,我都將我嘅self-doubt就地拋出公海。
掉個歌單出嚟,佢第一個舉腳贊同。「車~啲人唔識有咩所謂啫,妳自己鍾意啊嘛?鍾意就會感動同好聽㗎啦。」又係bor,唱我自己鍾意嘅歌有咩問題?
睇嚟我啲流行歌手genes太根深蒂固,太習慣服務人群,好在今次有人慫恿我照顧吓自己個心。
回想當年(2017)第一次合作《極夜後》,佢都係咁嘅氣勢,完全無變過。
有片有真相~
當時佢上嚟goomusic,慢慢聽我啲零碎demo、超有耐性咁傾啊傾,試圖理解我所想。
我話想試試寫詞,佢大大力讚好。寫到一半好kick,覺得自己好廢,「唉我中文真係好差,不如搵阿邊個邊個幫手啦?」佢堅決反對,叫我咪講咁多攞嚟睇吓先啦。埋mic試唱,佢喺control panel表示:「唔係啊,填得幾好wor,係要改少少啫。」
感動到我呢🥹。
一直好記得當年嗰次合作。佢係第一個斬釘截鐵堅持我一定寫到詞嘅製作人,亦因為有佢堅定的push,最後真係幫我完成咗人生第一份詞。
感恩有呢位咁願意同我慢慢試、慢慢搵啱方向嘅夥伴。
事隔七年,大家都有所成長,今次會拼出什麼來?
我好期待。
感想3/// 身體challenges
正所謂,閒時好地地,做騷short short地。
身體永遠喺show前就會tense up,加上今次係久休復出,在所難免。
本週初無啦啦腸胃炎,頭痛屙嘔暈陀陀癱瘓三日。練唔到嘢個心超急。另,個牙教therapy接近尾聲但尚未完成,肩頸膊狀態仍然不穩定,練結他只能適度。各樣那樣啦,都係要鍛鍊我搵最好平衡。
係會心急㗎,但完全無得急,要聽從身體,學習surrender。
注意,Surrender不等同於放棄嘗試。在限制中,做自己可以做到嘅嘢。Focused practice提早練歌練結他vocal training,每朝持續勤力半跑半散步(俗稱風雨不改,有兩日跑到變落湯🐔)、拉筋、小心飲食、早睡早起。
啊,仲有不斷提自己彈結他時坐直啲,有幫助。
感想4//// Goo Growth
某日跑步,聽個rundown playlist覺得好得意。
Shuffle咁播,咁啱由早期嘅歌,連住播到某首經典金曲,到近幾年嘅,最後到《威廉》。
聽住把聲,完全feel到呢個人個變化是多麼多麼的大。
慶幸自己個演繹隨住年月越嚟越放鬆。或許已慢慢學懂釋懷,值得為自己驕傲一小吓🤗。Well done goojai!
亦不禁讚嘆我每個階段都會搵到最適合自己當刻嘅監製同團隊。
Instinct嘅嘢,哈哈哈。
年頭獲得Keyword : Simplicity.
活到今天,能丟掉的都該丟掉,任何多餘的。
如何讓今次的歌曲和音樂,更貼近此刻生活中的簡約狀態。
唔容易,畢竟歌手做咗二十幾年,有好多Muscle Memory。
有些配套,包括檯燈聲梳化服,明知該strip down至少95%,但夜闌人靜時總會有self-doubt。也是合情合理。歌單中歌曲選上的一刻,全憑直覺。直覺不騙人,但偶爾也會自我質疑,這樣真的可以嗎?
不安全感往往來自不自信,要跨過,勤呼吸是一個方法,當然加倍練習是基本。
相信自己、相信夥伴、相信宇宙總會給妳最適合的鍛鍊。
然後提醒自己,也可以對(妳的)觀眾多點信心啊😉。
我們或許在各自的路徑上,遇見的和感受的儘管不能相同,但「真摯」依舊是人類最共同的語言。
歡迎大家本週五,一同潛入我這個小小房間。
HOCC SPRING LIVE 2024
Online Livestream 網上音樂會
日期:2024年5月10日
時間:晚上八時
地點:goomomoon.com (網上觀看)
網上購票:請到 GMM登記或登入重啟Tier 2會籍*
*注意:Tier 2會費為 32USD (約港幣250元),
會員可於演唱會後隨時自行暫停或取消會籍。
早☀️作為何韻詩牙骹問題關注組,一直不敢去拔牙
我都係由極夜後(發行)嗰年開始認識妳🥹而家成長咗好多~~