Freshness~!

Hocc Newsletter | 04/08/24

Hi I'm back👋🏽。

死守三年，無打針又無中過，到上月中終於中咗蕉（雖然check極都係一線女歌手，check到二嬸勸我唔好再浪費啲快測🤣）。病咗五日，但條手尾長，Covid完變大傷風，訓極都好攰，兩個禮拜後嘅今日先完全恢復正常，終於運作到。

1/

病柺人之前費事周圍走傳染人，上週唯有安坐家中睇奧運。

決賽初賽、有牌無牌都儘量支持，最鍾意睇香港運動員如何在落敗時調整自己心態，到比賽時刻呢樣先係最最最難。日常苦練嘅技術攞唔攞到出嚟，好講臨場心理質素。「好勝」可以係一個drive，同時「唔諗輸贏」亦可以係取勝點。

其中最深刻係羽毛球女雙兩個妹妹楊雅婷同楊霈霖，最後一場小組賽雖不敵中國隊，但全場都打得非常好，明顯發揮到自己水準；直到最後一刻都無放棄，無因為對方係四號種子而睇少自己，專注地一分一分咁追上去。

睇到香港運動員喺支援明顯不足嘅環境下都仍然咁堅毅努力、唔放棄爭取，好inspiring。同時都會parallel返自己，夠唔夠努力、有無佢地咁專注？嘗試從佢地身上draw到呢種energy同自律。

說到底，要邁向一個目標，inner discipline比一切其他都重要。

有時就係將目標諗得太大太遠，令自己太overwhelmed而卻步、拖延同逃避。Remedy就係，唔好諗太遠，專注現在，一步一步、一日一日，put in the work，做可以做嘅嘢。

2//

繼續被sub-concious mind強烈呼喚到teenage days，買咗呢本中文版。

好sync我而家個狀態，一路睇一路勾起小片段。

“Stay True” by Hua Hsu.

最近成日見到啲Gen X memes，不知何時無啦啦trend咗。主調都係話我地係invisible generation，亦樂於成為隱形一族。講真當年完全無理自己係乜generation（都唔興，可能無social media，抄唔起？），第一次聽Generation X呢個詞語，係郭富城隻「唱這歌」單腳pose，心諗乜Q啊咁娘嘅。

諗返我地都真係最chill嘅一代，阿爸阿媽掛住返工邊度得閒管我地，無手機又無得被call被追蹤，慣性自生自滅變成某種DIY獨立；Analog過度Digital就係我地呢代，got the best of both worlds。當時社會又無乜注意我地，完全可以fly under the radar，就連depression、anxiety呢啲字眼都未成潮流，有乜唔開心覺得自己好慘，自己搵辦法搞掂佢啦咪鬼嘈嘈閉。

（呢個好無謂地笑👆🏽😂）

3///

突然想Freshness吓。

漫長地坐喺度漂緊個頭之際，友人路過問，咦有show啊？無啊，無原因，即興架咋。

其實做嘢又唔一定需要有「原因」嘅，覺得啱數，咪做囉。

咁講，剪頭髮對我嚟講都係某種ritual——externally想改頭換面，通常都係因為internal有嘢ready想變。