呢排唔知搭啱咗邊條線，係咁聽同睇關於理財同F.I.R.E. (Financial Independence Retire Early)嘅書、podcasts等，是日決定認真理吓自己個財，主力review吓一路由佢地自己自由行嗰堆N個recurring subscriptions。
哇哇哇，唔睇柚子河，一睇發現原來自己不斷俾緊好多冤枉娛樂錢！1
認真翻開檢閱各個帳戶，發現原來自己有不下三四五六個完全唔記得仲subscribe緊嘅service；包括好耐好耐好耐好耐好耐好耐(好耐!!!!!）之前用過幾次嘅Survey Monkey，同埋上年用過嚟上平面設計課程嘅Skillshare。哇呢度加埋每年都已經幾千蚊，唉真係睬爆。
其餘就有啲用過一輪但後來無咁積極用，但又會心諗「可能遲啲有用呢？」嘅online services，通常都係同做音樂/創作有關，例如Milanote，或者Protools、Apple Music等（但我同時有spotify）。
最克人憎嘅係，有啲services如Audible（audiobooks) 同Splice (音樂嘢），每個月會配給一定數量credits俾你，累積落嚟就會停唔到，因為cancel就會無曬，但又永遠都用唔完現有嗰啲，唯有繼續subscribe住先，真係惡性循環無限輪迴max。
是日終於「的」起心肝正視佢地。
首先就由「絕對唔會再用」嘅類別入手，再處理「食之無味」類別。搞咗大半日，有啲趕及尾班車啱啱cancel得切唔洗俾多個月（yay！），有啲就啱啱錯過咗已經俾多咗一年（妖！），但綜合全日成績，總算成功取消咗每月過千蚊嘅無謂subscriptions，爽啊！
然後再回顧一下全日經驗，有以下幾點心得可以分享：
1）Cancel魔咒之special discount（🙄）
拿可能呢個大家一早知，但我真係啱啱先發現。
啲公司好多都好狡猾，如果你一路唔理佢俾佢auto-renew，唔會平俾你都算，有啲公司仲會偷偷加咗價你都唔知2。
而如果你突然心血來潮話想取消訂閱，神奇嘅事就會發生！你一撳個 “Cancel”掣，個畫面就會彈個prompt出嚟：
“70% off the next year if you continue now!!!!
拿營銷手法我真係明嘅，不過作為長期客戶真係會幾pissed off。吓？我唔話走你都唔俾優惠我？係我就即刻走快啲。
大家可以試試看，喺現有嘅subscriptions得閒督吓個cancel制，睇吓會唔會為自己成功爭取半價plus優惠。
2）Pause功能突然現身 （之市道應該真係好差）
有幾個service例如上述嘅Audible同Splice，都突然推出咗“Pause subscription”呢個功能。（之前係無㗎，我肯定！）
Pause同cancel嘅分別係：Pause，你就你可以留住自己嘅account，但停一停個payment先；現有嘅credits就因應每間公司唔同處理，有啲可以俾你繼續pause住用，有啲就幫你留住但要你resume subscription先用到，但總之點都好過之前咁，一cancel就乜都無曬。
我諗市道真係好差呢啲megacap先會突然慷慨起來，如果大家有類似呢啲credit based嘅訂閱都可以試試看，有得pause就千祈唔洗同我客氣。
3）天下沒有免費Free Trial——如何防止忘記取消訂閱
無論係想試用嗰啲7 days Free Trial，或者想避免錯過月費deadline唔記得cancel，都可以用以下呢個方法。
例如，你用ios某app登記咗Free trial，入去Icloud»Subscriptions，就會見到所有現有訂閱。鎖定邊個你唔想再用嘅，按“Cancel subscription”，並且唔需要等到期嗰日。同樣，如果係俾咗嘅月費/年費嘅訂閱唔想再繼續，都係同樣做法。（Android我就唔肯定點操作，但相信都係差不多意思）
個系統會幫你計返仲有幾多日free trial，或者你已經俾錢俾到邊日，然後顯示 “Expires on 12th August 2025” 之類（如下圖），你就可以一路用到嗰日。
如果係網站嘅service，大部分都會用同樣處理方法，不過都可能因應唔同公司有唔同做法，自己睇清楚。
用呢個方法，一來你唔會唔記得取消，二來如果你真係到時仲想繼續，可能仲會send個discount offer俾你添（再反眼😪），到時先決定繼續唔繼續都仲得。
4）Streaming services：需要時服
太多嘢要subscribe，例如所有電視電影串流平台（Netflix, Apple TV, Disney+, etc) ，應該點取捨？
其中一個做法係，需要時服，想睇先訂。
多咗streaming platforms，即係每個streaming platform都少咗真心精彩嘅content可以睇，所以真係唔太需要同時訂閱曬全部嘅。你可以考慮每次只訂閱一個平台，到八八九九睇曬想睇嘅嘢，先取消再轉去另一個平台，如此類推。
當然呢個做法就唔係好適合好想緊貼「潮流」第一時間睇曬所有話題作嘅人，但其餘無需要追得咁貼嘅普羅大眾，可考慮。
當然亦可以考慮同家人sss共用family plan，不過呢啲我估大家自有方法，我喺度就唔多講喇😝。
5）所有訂閱集中用一張信用卡
我尋日做嘅另一動作就係將全部訂閱，移曬去用同一張信用卡statement找數。
我估大家手上都有不止一張信用卡，而因為呢啲subscriptions好多時都係即興購物無諗咁多，甚至有啲自遠古已經開始訂閱，所以好多時都會分散咗好幾張唔同嘅信用卡。
將佢地放返喺同一張卡之下（仲可以理解吓邊張卡嘅cash rewards最適合自己😝呢樣都係我呢排突然醉心研究嘅，哈哈哈哈），除咗方便自己每月找數之外，亦可以方便定時定候檢視吓自己係咪仲需要所有訂閱，一目了然。
而家個世界已經全行subscription mode（咁其實我自己GMM都係嘅，哈哈，都鼓勵大家review埋我😌），太容易有訂閱咗就擱置喺度嘅情況出現，所以大家真係要精明消費。
唔好意思呢度突然變咗財經台，只因我自己最近無啦啦認真理起財來，理吓理吓就覺得點解我而家先搞，真係笨咗太耐！然後就諗，如果一早有人話我知呢啲竅門就好喇，慳到嘅錢分分鐘可以喺好景大酒樓擺幾十圍謝菇宴🙈。就膽粗粗喺度分享吓啦，如果有高人有更多tips都不妨喺留言度分享。
不過，公道講句，其實又都唔係無人提嘅，歷年嚟都有人不斷nag我鵝我，只係我一路聽唔入耳，嗰個人就係goomo，哈哈哈哈。
我諗我而家突然積極起來，同時最反眼同最安慰嗰個都應該係佢。
呢度每一篇文章，全靠GMM會員支持先能夠繼續存在。
如果大家想支持我繼續創作及免費分享音樂同文字，可以考慮加入我地：
Sam hui補充：利申我啲personal finances完全無問題，無欠債無財赤，但係好多時都係憑感覺行事🤣，全因我地嘅財務總管goomo靚女個系統太過強大，一毫子都幫我睇到實，以致我長期心安理得/懶，掉曬俾佢搞，有人搞自不然就會鬆懈同埋唔理啦，係咪先係咪先？
或者勁sneaky咁寫咗喺啲 8pt fineprint度囉，但who has time for fineprint??!! Who!!!???
Streaming真係要睇先sub，有時sub咗無時間睇，個個月白俾錢，而且想睇嘅又永遠都喺唔同platform上！加上好多劇都會成個season上架，而家想睇就sub一個月，當睇咗場戲嘅價錢。
講起review subscription,我唯一嘅訂閱(黑洞)就係GMM🤣🤣 雖然唔算超級active,但大大話話都由22年4月開始 斷斷續續subscribe咗廿八個月嘅tier2,間中join下WWG,翻睇live振奮下士氣,其實早在上年年頭已經review過,所以先pause咗(初時連續sub咗兩年),點知兩個月後宣佈有mini live,又resume咗一個月,然後近排又有練歌live,每次睇完都開心成晚😬,所以又唔捨得pause,諗住最起碼都等埋出碟先吖,哈哈哈哈哈
btw希望真係可以喺好景大酒樓擺幾十圍謝菇宴啦🙃🙈