Creative Diary – Thursday January 18th, 2024
創作係好個人亦反映靈魂嘅事，你作嘅曲、寫嘅詞，完完全全將你嘅五臟六腑展露，而編曲作為一首歌嘅載體，當然都係。
今年決定認真攻破呢道牆。
初入行，身邊突然多咗一堆音樂人朋友：英師傅、Carl叔叔，加埋同樣係歌手但早我幾年出唱片嘅「二家姐」————盧巧音。
時為1999年，當時嘅我只係止步於用結他掃chord、求其搵部MD機一take過錄低成條track嘅小學雞程度，見到身邊呢個Candy Lo，哇佢識用電腦midi software wor（好似係digital performer），仲可以將自己嘅歌編制成簡單嘅、有鼓有bass有結他嘅demo，覺得佢超勁。
當時極為inspired，因此後來正式成為歌手後，決定添置簡單器材，喺炮台山幾百呎嘅豆潤兩房一廳騰空其中一間房做home studio，開始自己整啲低能demos。
初試編曲之尺八事件
《天使藍》、《化蝶》、《光明會》等，都係咁盲摸摸咁整出嚟。其中一首至今仍令青山大樂隊津津樂道嘅《化蝶》，應該係第一個full demo嘅attempt，加咗鼓啊、bass啊，仲有一條「尺八」嘅main melody line。當年我整完個demo之後，滿心歡喜俾大家聽，跟手大家笑咗嗰條尺八好耐。當時我為咗掩飾自己嘅尷尬，當然都係一齊笑埋一份，但諗返轉頭，呢個應該係第一個打沉自己編曲魂嘅moment。
後來有繼續試，但到某個位開始遇上樽頸，覺得自己整嚟整去都好難聽，好amateur，漸漸就唔想再俾力整。當然，當年亦未好似而家，有咁多online course可以上，亦從來無諗過可以正正經經搵人教或者去學。慢慢啲儀器同個keyboard都開始封塵，寫咗咩demo一係就求其用結他錄咗就算，一係就搵hobing幫我turbo彈條piano，快手快腳搞掂佢。當時諗：「反正咁多叻人喺身邊，咁方便，我咁渣都係算吧啦。」
就係咁，一直認定自己唔識亦無天份編曲。
再試編曲之試完又棄完又試
直至三年前，疫情開始，人人都stuck咗喺度無嘢好做，我決定搵老師阿GTB楊彤老師上門去Goomusic教我點用Ableton (music software)。
當時都上咗七八堂左右，一如我學任何嘢一樣，好快就上手，但又好快就無心機再練。實際棄船原因好似係因為手痛定膊頭痛之類，不過係咪咁，定或者又有其他shiny thing扯走咗我，都唔緊要喇，總之就係當時自己未ready，加上唔夠決心、懶啦。結果學完又俾返曬老師。
然後fast forward到上年，決志搵返歌手魂。
先Tackle自己嘅作詞部分，《威廉》算係開咗個唔錯嘅頭（而家仍在努力鍛鍊）。音樂上，搵咗明仔主理（加佢嘅人山人海），期間一直依靠其他人，例如另外兩位監製端記Vee同Jason幫我找尋同塑造新Goo sound，期間亦開拓到我一啲音樂上嘅mindset同視野。
但坦白講，仍然依稀覺得自己嘅creative output未能完全呈現，聲音表達上始終爭咗某啲嘢咁。
宏觀過往咁多碟咁多歌，當中同唔同製作人編曲人合作，都能準確代表當時嘅自己。又或者應該話，當年嘅自己著重嘅比較係歌曲旋律同訊息，成個sound相對下並非我嘅priority，只要個整體感覺貼近就可以，有人幫自己演繹亦完全無問題。
但日子過去，個人狀態亦有好大轉變，時至今日，隨住一路往自己入面挖，開始有種好渴望可以透過音樂去傳達我靈魂最深處嗰把聲。而呢把聲音到底係點㗎呢？到底「我」個sound係咩？我都唔知，更莫講要用言語表達。
如果話以前想表達嘅事物比較淺層，可以單靠描述就可以同合作嘅音樂人傳達到自己嘅需求，到而家，嗰種深層，可能真係要靠自己雙手，搵方法傳譯出嚟。
（👆🏽有片有真相，2020年二月向老師交功課嘅一刻，個樣幾咁熬底🤣👆🏽）
得唔得雖然聰明未必乜都duck
之所以呢幾年一直有種frustration，覺得未能完全將入面一啲嘢解鎖，或者呈現。但自己又「唔叻」、「唔識」寫詞編曲，咁點算？
然後，某日聽咗Andrew Huberman嘅podcast “Dr. Adam Grant: How to Unlock Your Potential, Motivation & Unique Abilities”。
當中提及，我地自小到成年，都總會有某種特定想法，覺得自己呢樣嘢叻、嗰樣嘢唔叻。但其實當中嘅成因，包含比「有無天份」更複雜嘅千絲萬縷關係圖：可能係曾經做某件事得到盛讚（但未必係好），或者試過某樣嘢後俾側邊朋友笑等，然後導致自己決定喺邊一個範疇俾力，喺另外邊啲地方完全避開。
久而久之，你用力嘅地方，因為得到長期嘅鍛鍊、feedback再改進，當然會比其他範圍更優秀。相反，你避開嘅東西，因為完全無用過，就更加self-fulfilling prophecy咁越嚟越「唔叻」喇。
諗落，又係wor，我一路覺得自己叻作曲，但唔叻寫詞，唔識編曲，但事實係，呢二十幾年，我花喺作曲嘅時間，比另外兩樣多好幾十至幾百倍，完成嘅作品亦係以數十倍計。編曲早年試完就放棄做，作詞根本一直都無試過。另一個關鍵位，作曲嘅作品完成後再推出，得到嘅feedback，例如邊個話好鍾意首歌，無形間會令自己更有信心，然後下次再做同樣嘅工種會更得心應手，或更大膽去作出其他嘗試。
相反，覺得自己唔識、唔叻嘅嘢，自己已經落閘先，根本無花時間去試或者去學。二十幾年來完全無運用過呢個技能，做得無另外嗰樣嘢咁好係幾咁正常呢。
當然，決定花時間喺邊度，關乎你嘅經歷。身邊人有無俾適當鼓勵你去探索某樣技能，又或者喺你膽粗粗初試牛刀時，得到啲咩嘅feedback。如果有人喺嗰個重要moment令你感到挫敗，定係加以鼓勵你嘅efforts。 上述當年嘅《化蝶》demo係其中一個例子（雖然身邊其他人唔係故意想打沉你），而寫詞方面，2017年第一次試牛刀寫《極夜後》，歌曲出世後，不斷收到comment話「你都係搵Wyman寫啦」、「好期待你再同YY合作」，又係另一個陷入self-defeat嘅例子。
2024實踐篇之做啦先算啦講咁多
集合以上所有，三年後嘅今日，我決定，無論如何都唔可以再俾藉口自己，今年點都要令自己攻破編曲。
首先，我決定要解決setup問題。Abraham Lincoln講過 “Give me six hours to chop down a tree, and I will spend the first four sharpening my axe.” 工欲善其事，必先利其器，如果成就某件事，首先係要將你同呢件事之間嘅friction point減到最低。
諗落，我過往次次想試編曲，首先都要花一個鐘搵啲interface出嚟、插線、插咪、駁返啲嘢，入到個DAW（Digital Audio Workstation)又要摸一輪先記得返啲嘢點用，到搞得嚟都已經無曬心力時間去創作。到下次想再試，諗起呢輪功夫已經攰咗。
為確保自己唔會再犯同樣錯誤，2024年一月第一個禮拜，我啲起心肝將studio嘅電腦同錄音gear全部博通。檯面個Arrow interface係hobing二手過俾我嘅，通常呢啲second hand嘢因為唔係自己買，都會一路heah住用。我決定死死地氣上網搵個tutorial睇咗佢，結果十分鐘就已經明咗點用（點解唔早啲做呢）。
Setup好，我用咗第二個禮拜去重新熟習返Ableton入面嘅functions，搵返之前online上堂嗰啲notes出嚟，開返個file嚟睇返啲settings，然後逼自己用呢個方法寫咗今年一個功課demo “Last Journey”。閒時再喺YouTube搵啲music production嘅頻道狂睇，令自己進入音樂製作vibe。
學習一件事，最緊要除咗練習，同樣重要嘅係要將自己做咗嘅成品掉出去俾人聽，先有可能進步。我地經常係自己最harsh嘅critic，好多時會諗到自己嘅嘢一文不值，如果能夠衝破心理關口，將自己嘅功課同其他人分享，你會發現原來自己做嘅嘢都有可取嘅地方。攞完feedback，一步步再改善，呢個先係有效學習嘅方法。
因此我join咗網上一個music club，入埋個discord，等自己周圍可以多啲like-minded people。有日，喺studio寫詞寫到個腦實曬，決定俾自己一個鐘去做一個功課。有時間限制，更果斷去做決定，例如揀聲呢啲無止境嘅步驟，可以揀到天荒地老。但因有時間有限，會基於“Ok, that’s good enough”嘅準則要自己收手，然後commit。
最後做咗呢個功課出嚟：
Not too shabby.😎
正所謂“Done is better than perfect.”
👆🏽最近經常用呢個motto鞭自己👆🏽。
做創作太容易執著於要自己每一個作品都「完美」，唔到最最最最好都唔想攞出嚟。但何謂「好」呢？
我覺得創作人本身，對自己嘅作品，永遠係最差嗰個judge。
咁多年嚟我就係犯咗呢個錯誤。永遠strive for perfection，永遠乜都完成唔到，因為「完美」永遠都會有更「完美」。唔係話要放縱自己做一啲好差嘅嘢出嚟，但好差同所謂完美之間，可以有好多程度嘅「完成」。喺deadline之內盡能力做到最好，striving for “good enough” ，可能係創作人嘅上策。
呢個月，喺慢慢練習，慢慢嘗試後，感覺到自己嘅能力一點一點咁提升。由最開頭舉步維艱，到而家開完個DAW開個file後可以喺個半鐘內完成到一個都算有趣同decent嘅demo，並且不斷鍛鍊自己試一啲無試過嘅風格。我諗，今次嘅編曲路，終於可以行落去喇。
Gooblog伸延討論：有咩係你一直認定自己唔叻，但好想再試吓做嘅？
好開心睇到你分享你嘅創作心路歷程，我覺得對自己都好inspiring！🫶🏻 因為我都成日俾隔離果個話我好執著啲野要完美而搞到咩都behind schedule，我都係最近先學識 ”Done is better than perfect.” 希望我嘅deadline fighter風格可以唔洗咁deadline la…🙈（而其實成日用左好多時間fine tune緊啲無太大所謂嘅野，當然係完左之後抽番個身先發現點解自己浪費咁多時間！）
期待久違的新作，加油👏🏻