消失咗成個禮拜，因入咗個後期製作黑洞，親身去印刷廠睇色趕工、再去碟廠用四個鐘將首批黑膠簽完。
首批黑膠喺我地連日奮鬥趕製下，終於印好簽好pack完，準備寄出。
今次花咗好多心機時間令到整個印刷效果同埋手工可以做返我當年細個八九十年代買黑膠嘅質感同感官，由封套手感去到內頁，以至隻黑膠碟顏色（無錯係最原始嘅黑色），再去到隻碟本身個磅數，都盡量復刻參照當年黑膠嘅氣氛。
當日攞住兩隻我放咗三十年嘅碟（《妖女》同《梅艷芳》*似火探戈 ），返來覆去同印刷團隊研究咗兩個鐘————擺咗三十年，隻碟當然有歲月痕跡，但基本結構仍完整無缺，到底係點做到？
原來一切源於手工。
今天科技比當日更發達，印刷上能做到嘅嘢更多；一隻對摺嘅黑膠碟，一整片印出嚟，摺摺摺痴痴，工序簡單，好快手就可以完成。但換嚟係太厚太重太論盡、唔好彩嘅擺幾年就會瓦解彈開。
而黑膠年代嘅碟，雖然做法比較慢同繁複，用包書嘅手工方法，做完一層先可以去下一浸；有可能因為當時未做到而家嘅印刷技巧，唯有逐步拆解，做完一個步驟先可以去下個步驟，要俾時間等乾。但換嚟，係能經歷日子，放咗咁多年，仲要穿州過省移民再回流，都仍然無穿無爛。
攞住隻三十年歷史嘅reference，我問，做唔做返到咁薄咁實淨？
「得！度度佢！」
一句到尾。感動。
就係咁，四個禮拜後，我第一張黑膠大碟封套，完整完成。
攞到上手好感動，感動在於當中牽涉好多人挨更抵夜嘅心血同埋唔嫌我麻煩嘅配合，而我有幸可以近距離見到各工匠咁落力追求完美、咁落力做好自己嗰部份，覺得個世界始終都仲係存在著美好嘅，而喺佢地身上我亦能繼續學習到好多嘢，於此，我極爲感恩。
當世界充斥住花巧搶眼球，要做返最簡單平實嘅事物反而係最難，因為簡單嘅嘢sell嘅係本質，冇遮冇掩就最容易露底、最考真功夫、最不能用科技堆砌。但亦因此，先能更恆久雋永。
當然過程中，只有你自己希望追求到某個高度亦無用，畢竟每個步驟都需要擁有其專業嘅人去幫，有同樣力求完美嘅團隊配合，先能夠成事。而能夠遇上志同道合嘅人，講求嘅，其中一樣最重要嘅元素，係運氣。
我相信我係一直被上天眷顧嘅。去到我呢個人生階段，能夠繼續咁任性地、有條件、有夥伴同我一齊追求我心目中嘅美好同盡善盡美，真係覺得好黐線地幸福。
多謝大家咁有耐性，等咗我咁耐，容許我喺呢個瘋狂世界放任地慢工出細貨。呢隻由落筆寫威廉嗰日開始，足足做咗四年嘅碟，終於要誕生喇，多謝每一位沿途陪伴嘅大家。
p.s. 尋日喺大家漏夜pack pack pack下終於準備就緒，下周初開始陸續寄出，首批第一日預購嘅，準備你地嘅興奮心情迎接我地嘅心血結晶啦啦啦啦啦。（但仍然待貨中，請其餘各位耐心等候🙌🏽）
黑膠、CD、Cassette以及其他merch，4月2號同步發售。
呢度每一篇文章，同埋我嘅大碟製作，全靠GMM會員支持先能夠繼續進行。
如果大家想支持我地團隊，可以👉🏾按此加入👈🏾我地呢個大家庭。
謝謝每位會員嘅長期支持。
“Projet 1475” Official merch site : Hall1c.com
終於迎來人生中第一張黑膠 期待
希望之後會有更加多張😂
但係先要買部黑膠碟機先聽到你把聲😬🥹🥹