喺IG寫咗Pre-Release感謝文，喺度再補充少少。
如果返去訪問2022年尾嗰個我，應該諗都無諗過隻碟要寫足三年。而其實三年轉眼就過咗，回想返又好似真係需要咁耐。當時睇Rick Rubin鼓勵自己，見佢講“It will take however long it takes to complete”都仲未係好明，到而家完全明曬。
最難嘅，除咗要克服廣東話廣東詞呢啲技術問題外，仲有自己嘅心態。
慣咗快、慣咗諗到就火速完成，再加上覺得自己已經「浪費」咗嘅咁多日子（基本上係2013年後），就更加心急如焚。而且耐不耐就會俾啲老菇徒串嘴兩下話自己等到頸都斷（我心諗你寫啊笨），把口唔忿氣當然會鬧返轉頭，但實際上內心極度自責，覺得自己點解咁廢、係咪歌手嚟㗎，然後就比心急更心急。
有啲嘢真係只能專心做，一分心，包括外來壓力都係分心嘅一種，就做唔到。
所以我到今日都覺得當日停咗個podcast係正確（雖然有時都會掛住個八婆）、轉咗嚟substack、唔再覺得要時時刻刻更新social media係正確，用各種方法去克服拖延、改善陋習，以致容許自己慢慢用 “however long it takes”呢個心態去完成，都係正確。
事實上到最後我都係有心急，尤其年頭拋咗個身出嚟，大聲講咗要今年內要出，有面子同時間壓力。
但係去到十月頭發現根本係無可能，某日panic啲嘢做唔完之際，突然諗：「黐線，我咁趕為乜？」突然恍然大悟。逼死自己事小，逼死條team又何必呢？與其死趕爛趕嗰個模擬deadline（但都要多謝呢個deadline，同埋無啦啦幫我宣揚咗出去搞到我無得返轉頭嘅記者朋友ss🤣），不如俾多少少時間自己同埋團隊做好件事。
俾班死嘢串兩句又有乜所謂，最後做到就得。
過程中有幾難幾乜幾物，是但啦，都已成過去。
當然創作可以永無止境地refine，太自由又會無限拖。但deadline光譜嘅另一面，都有分為趕而趕，定係俾足時間但喺合理範圍內一齊做到最好。
結果喺十月頭，我決定，俾多一個月自己同大家，一齊做好佢。
好在咁做，否則最後就唔會有呢首臨時加嘅 “Saint-Laurent”，唔會有何丙嘅加入，亦唔會有咁圓滿嘅closing。
雖然後期仍然有極～～～～～多，並且有成本書未寫完，但最難嘅一部分已經超額完成，今日可以俾自己好好慶祝、感動一下。
順帶一提，完成整張專輯後，我發現，我對於理解自己嘅文字亦有了新體會：唔會再出現「夠唔夠好」呢啲想法，甚至唔再care「人地」覺得好唔好。呢個係好大突破，睇返timeline，應該係從九月寫嘅一隻歌“If we were”開始。呢隻歌題材極赤裸，而且vulnerable，一路寫落去，發現佢自己有自己套路，無論我當初點設計，最終文字都係用返佢地想要嘅方法呈現。
應該係由嗰刻開始，我學會不用眼睛和腦袋去判斷，而係轉用官能去感受。原來歌與詞都自帶生命，你只要get out of the way，就可以。
廣東詞，Nice to meet you again😉。
呢度每一篇文章、同埋我嘅音樂製作，全靠GMM會員支持先能夠繼續運作。
如果大家想支持我地團隊、同埋想優先預購嚟緊大碟，
可以考慮加入我地呢個大家庭：
能夠喺我teenage完之前聽到隻碟實在是太好了!😍🥳
超級感謝妳嘅堅持ヾ(@^▽^@)ノ
恭喜掌門。🙌🏻
有時候真的會恍惚忘記，妳的確是歌手；但每次看到妳在大家面前唱歌的時候，又好感嘆「哇，這個人會發光啊。」