終於嚟到蛇仔條尾，農曆年最後一日，總算無驚無險（現今來說實屬blessing🙌🏽）。臨近年尾都趕到我頭昏腦脹，但宏觀今年學到最多嘅係：如何順勢、放棄掙扎。
話說過去呢年係本命年，本來心急仔，預定十二月快快手出咗隻碟佢了咗件事，但阿八婆大師（無錯，無見一排，已榮升大師）屢勸我咪咁大動作，「慢慢搞啦你～」。因此就（死死地氣）順住個流，乖乖地默默做好件事佢。
令我印象最深刻嘅係佢話：「你咪試吓囉，個天真係對你好嘅，係唔會俾你（喺唔啱嘅時間點）做得完。」
豈有此理豈有此理豈有此理（fik頭髮），次次都俾佢講中，果然真正重要嘅事係急唔嚟。
不過又咁，有時你覺得所謂「最好」嘅，都只係你心目中、想像中嘅最好；學習放開都係謙卑嘅一種。唔好覺得你能夠掌控一切，跟你個timeline就等於萬無一失；俾宇宙話返事之餘亦讓事情循自然軌道發展，可能有超出你有限思維能想像嘅結果。
喺度預祝大家馬年所有人和事都馬到菇成，健康順利平安。
話說，剛剛整個月主力準備黑膠後期，以及開始籌備黑膠預購前之一萬樣雜項（pre-order資訊請碌到最底😉）。全力做admin嘢嘅同時，感覺到身體對創作部分十分想念，好想快啲搞掂啲嘢，可以返去寫歌寫字寫歌寫字。
當中唯一比較靠近右腦嘅，係去碟廠試聽黑膠sample。
咁大個人做咗二十幾年就嚟三十年（！！🥶！！）歌手，到今日先第一次出黑膠，喺製作過程中發現原來真係好多嘢都唔識，果然係方中Sir之活到老學到老。
近年九十年代trend回流，黑膠CD再次興起，是日接埋明仔到碟廠，碟廠同事帶我地走一轉參觀佢地個倉（全港嘅碟喺曬度），就到試聽室去聽我地隻心血製成品。
為何做黑膠要兩個月，事關香港基本上無廠印黑膠，要送去外國印。而印碟可以選日本（要排半年）、德國、捷克或者大陸（well~) 等地黑膠廠，我地今次揀咗德國。
據明仔稱，當年Analog年代做歌，其實好少會做大碟Mastering，通常只係將全部歌排曬一齊就搞掂，甚至唔會特登去碟廠聽，但咁「求其」，又反而好好聲，激死。
據我嘅半專業/業餘估計，最主要係因為當年係Analog（母帶）轉Analog（黑膠、卡式帶），本身喺母帶能夠容納嘅frequencies，就已經等同黑膠本身，唔會多又唔會少，what you hear is what you get，應該係咁除非唔係（如果呢度有專業人士，歡迎喺留言指出錯處，或更深入解釋）。
相對起，而家確實複雜好多。首先因為要由Digital轉成Analog，Digital能容納嘅頻率同聲量好唔同，用digital聽到嘅嘢去到analog可能會拆或者爆，甚至會無咗，甚或多咗（🫠）；加上要顧及嘅平台又多，要分派去各個streaming platform，又唔知聽眾會用咩device去聽（喇叭、耳機、電話、電腦etc)，再要印成實體碟嘅話，又要另外處理。
我地今次出曬所有format，所以單係master已經做咗四個版本：Digital、黑膠、CD、cassette。每款實體都有佢嘅特質，個人經驗來講，有啲做過（例如CD，但已經係N年前），其他係全新體驗，老實講我都係邊做邊學。
入到錄音室，坐定，開播。
因為試聽黑膠喺專業studio，用大喇叭聽，同後來試聽cassette嘅體驗又完全唔同。由第一首《威廉》開始，唔知點解有啲緊張。一路播，聽到黑膠最trademark嘅劈裡啪啦聲，少少興奮，同時亦要適應同digital mix嘅分別。
聽到某一首，我同明仔不約而同要求再播一次，因為同我地認知嘅mix有啲唔同。同現場技師T討論過後，發現係黑膠嘅特質，令某啲上下嘅頻率無咗，中間嘅頻率又會強咗，加上黑膠碟嘅內圍同外圍嘅音質又會有啲唔同，所以我地聽到嘅「唔同」，實屬正常。
技師表示佢聽嘅時候無覺得有問題，旁邊幾位家庭觀眾都紛紛點頭表示認同，我同明仔兩個對望：「唔。。。不如都係聽多次啦。」
再聽多N次後，唔知係隻碟播到開咗聲，定係我地耳朵適應咗個音質，總之，又好似真係無事喇wor。
時間關係，大家決定ok收貨住先，每人攞住一隻白板碟開心離開。
隔天都係少少唔放心，再帶住隻碟去搵何家阿丙專家，用佢部high end少少嘅機再試播一次。
何丙再加以解釋，黑膠本身就會有low end distortion，同埋內圈會有所謂inner groove distortion，同支唱機針嘅角度有關，所以當年啲人排歌都會考慮到呢個技術問題，將比較重要嘅歌放喺Side A Side B嘅第一首。甚至而家有啲日本碟每面只放兩三首歌，就係為避免呢個問題。
不過我諗返，當年八十年代啲碟都係chur到盡㗎啦，有時一邊有成六首歌添，可能當年對音質要求比較咩掛，哈哈哈。
又第N次由頭聽，坦白講呢度啲喇叭又唔同，都無得真正比較，唯有憑感覺。Goomo喺旁邊遊吓遊吓扮睇電話偷聽，我話「妳不如坐埋嚟一齊啦～」。
何丙在旁陪聽，去到我同明仔覺得有疑惑嗰首，反覆聽咗一兩次，然後淡淡表示：「黑膠係咁㗎喇，我覺得ok啊。」
得到何阿丙認可，正式收貨！
做今隻碟，真心學到好多嘢，由創作到混音到完成印刷；當然如果要追求盡善盡美，一定有好多嘢可以做得更好，但又，有時讓事情good enough地到此為止，俾佢「出街」，都係artistry嘅一部分。
而且，今次袋到走嘅新知識，可以留待下次再用。
而我相信好快就會再用💪🏽😏🎵！
p.s. 順帶一提，黑膠將於農曆新年過後，同大家同步初七啟市，23/2 12pm開始預購，密切留意！（GMM會員再早兩日，21/2初五！）
p.p.s. Early Bird預購會有本地免郵優惠，並且會有首批黑膠限量號碼（隨購買先後次序派發）😉，唔好錯過。
呢度每一篇文章、同埋我嘅音樂製作，全靠GMM會員支持先能夠繼續運作。
如果大家想支持我地團隊、同埋想優先預購嚟緊大碟、參與Live演出，
可以考慮👉🏾按此加入👈🏾我地呢個大家庭。
利是錢已經準備上交俾你喇😍
每次你寫嘅嘢唔多唔少都套到落自己身上.. (我放棄掙扎中,但唔甘心😂)
any肥預祝新碟大賣,好評如潮.
初五鬧鐘已set⏰️